RUBAVU: Abakora uburaya bahangayikishijwe n’uko bose batarabona urukingo rw’ubushita bw’inkende.
Abakora uburaya mu karere ka Rubavu basaga 40 nibo bamaze guhabwa urukingo rw’icyorezo cy’ubushita bw’inkende (MonkeyPox), mu gihe abarukeneye barenga ibihumbi 3500.
Aba bakora uburaya mu karere ka Rubavu, baganiriye na BWIZA dukesha iyi nkuru bavuga ko ikibateye impungenge ari ukubona urukingo rw’icyorezo cy’ubushita bw’inkende.
Uyu wahinduriwe izina akitwa (Afissa), akorera uburaya mu mirenge ya Kanama, Nyakiliba na Kanzenze avuga ko atewe impungenge no kuba atarakingiwe.
Ati: ”Twumvise ko batangiye gukingira turaza dusanga inkingo zashize, kandi dutewe inkeke no kuba tutarakingiwe kandi ari ibizakunda n’abakiriya bacu bakingirwa.”
Amina (Izina ryahinduwe), usanzwe ahagarariye abakora umwuga w’uburaya mu karere ka Rubavu, utuye mu murenge wa Nyamyumba, akagari ka Rubona yarakingiwe ariko avuga ko ahangayikishijwe na bagenzi be batabonye urukingo.
Ati: “Turashima Leta y’u Rwanda y’ubumwe yatwibutse ibigaragaza ko natwe turi abantu nk’abandi, gusa duhangayikishijwe n’uko inkingo zabaye nke, tugasaba ko zagera kuri bose. Iki cyorezo giteye ubwoba kuko hari uwakigaragayeho akaba ari gukurikiranirwa mu bitaro bya Gisenyi”.
Yaboneyeho gusaba ko bahabwa bahabwa urukingo rwa kabiri, kugira ngo umubiri wabo ugire ubudahangarwa kuri iki cyorezo, kuko abenshi muri bo bambuka umupaka bakajya gusambana mu gihugu cyagaragayemo iki cyorezo cyangwa bagahura nukivanye muri Congo.
Umuyobozi mukuru w’ibitaro bya Gisenyi, CSP. Dr. Tuganeyezu Oreste, ahamya ko inkingo babonye ari nkeya ugereranyije n’umubare w’abazikeneye.
Ati: “Gukingira n’imwe mu ngamba zo kurwanya icyorezo cy’ubushita bw’inkende, gusa umubare w’inkingo uhari ni muke cyane ugereranyije ni abazikeneye, twahereye ku bakoresha umupaka n’abakora uburaya, hari icyizere ko umubare w’inkingo uziyongera”.
Akomeza avuga ko izi nkingo zihenze, gusa Igihugu kirimo gukora ubuvugizi ngo ziboneke zihabwe abazikeneye.
Yaboneyeho gusaba abaturage kugira amakuru kuri iki cyorezo, bagakurikiza inama bahabwa n’inzego zibifitiye ububasha.
Muri aka karere habarurwa abakora umwuga w’uburaya barenga ibihumbi 3500 bahatuye, hatabariwemo abaza kubukora by’iminsi mike baba baturutse mu bice bitandukanye by’Igihugu
Yanditswe na NKURUNZIZA Bonaventure.